Rúmlega 15 "stones"

Æfing gærdagsins var góð. Ekki náðist þó alveg að hjóla í 2 tíma, lét 100 mínútur duga. Var kominn með náladofa í fæturna. Þetta er greinilega hin besta brennsla. Fór á vigtina í morgun eftir að hafa haldið til á hjólinu nánast í viku samfleytt. 96,2 kg sýndi vigtin, eða 15.15 steinar að hætti Breta, sem sagt 7 kg farinn frá 3. nóvember. Það hlítur að gera hlaupin léttari, allavega væri ég ekki til í að hlaupa með 7 kg þungan poka í eftirdragi. Það myndi gera manni erfitt fyrir.

 

NG

Hugleiðingar

Ég hef mjög gaman af því að lesa hugleiðingar hlaupagikkja. Á bloggsíðunni "dagbók ritarans" skrifar Gísli Ásgeirsson um hlaup og allt sem þeim tengist. Gísli og hans félagar hlaupa oft og mikið í einu. Síðastliðinn laugardag voru t.d. lagðir að baki 27 km í mikilli ófærð þar sem snjórinn var vaðinn uppá miðja ökkla. Yfirleitt er ekki farið út fyrir minna en 15 km í einu og vikurnar skila þ.a.l. mörgum kílómetrum í hús.

Þegar lesið er um slíka jaxla er óhjákvæmilegt að hugleiða hversu lang maður á enn í land. Hálfmaraþon í síðustu viku fór langt með að ganga frá mér og hlaup hafa legið á hakanum síðan vegna álagsmeiðsla, sem þó var búið að vara við. Hefur síðan verið hamast á þrekhjóli af miklum móð, en það jafnast ekki á við hlaupin sjálf. Vonandi fer þó að styttast í endurkomu á götur bæjarins því tíminn fer að verða naumur, ekki nema 60 dagar til stefnu. Það verður þó að halda fínni línu í prógraminu svo ekki komi til frekari meiðsli. Kannski gott að blanda hlaupum saman við hjól og fleira.

Í kvöld er stefnan að hjóla í 2 klst í einni beit á 85-90 snúningum á mínútu . Sjáum til hverning það gengur.

 

NG

Peter Crouch og fleira

Jæja, þá er hafin ný vika. Ekki hægt að segja annað en að hún byrji ágætlega, það er ekki laust við að maður sé laus við hið klassíska mánudagsþunglyndi. Það er nokkuð ljóst að það að göslast áfram á hlaupum eða á hjóli virkar mjög vel sem gegn skammdegisþunglyndinu.

Í dag var farið á tvær æfingar, annarsvegar í ræktina og hjólað í 70 mínútur. Þori ekki enn í hlaup þar sem vinstri fótur er aumur, vil ekki hætta á að lengja tímann á hliðarlínunni. Hinsvegar var farið á golfæfingu í Básum. Kom skemmtilega á óvart hvað maður tekur miklum framförum við að sleppa því að æfa.

Í gær var vakað fram á nótt, tilefnið úrslitakeppni NFL. Að mati undirritaðs besta sjónvarpsefni sem í boði er. Leikirnir voru ekki af verri endanum og úrslit réðust í framlengingu og á síðustu sekúndum. Mínir menn Colts léku á laugardag og sigruðu annan leikinn í röð á frábærum varnarleik. Eitthvað sem ekki hefur borið mikið á fram til þessa. Það er deginum ljósara að þeir sigra Superbowl ef vörnin heldur áfram á sömu braut.

Ánægjulegt var einnig að sjá Peter Crouch félaga minn færa knattspyrnuna á annan stall þegar hann afgreiddi einn síns liðs drengina í  Watford í hádeginu á laugardag. Þar er augljóslega á ferð besti knattspyrnumaður heims. Þórður Ágústsson hefur unnið sér ínn fría áskrift að Fréttablaðinu en hann var með rétt svar við getraun föstudagsins (Peter Crouch).Blaðið mun hér eftir liggja í póstkassanum þegar hann vaknar. Innilega til hamingju Þórður. 

 

NG

 

 

Getraun dagsins

 

 

Þorvaldur Örlygsson, sem er byrjaður að leika á ný á Íslandi eftir að hafa leikið með Nottingham Forest, Stoke og Oldham í Englandi, átti góðan leik í vörninni hjá KA. Hér sækir ???????? að honum.

Sá fyrsti sem birtir rétt svar í athugasemda dálknum hefur unnið sér inn fría áskrift að Fréttablaðinu.

NG

Hvorki fugl né fiskur

Ég tók æfingu dagsins í sundlauginni. Synti í hálftíma ca. 1.000 metra, nokkuð hressandi. Á leiðinni áttaði ég mig á því að ég er hvorki fugl né fiskur. Staðreyndin er sú að ég er nánast ósyndur og vatnshræddur. Að auki er ég ólýsanlega flughræddur. Það segir sig því sjálft að máltækið á vel við um undirritaðan.

NG

Vítavert kæruleysi

Töflufundurinn í gær leystist upp í tóma vitleysu. Þegar upp var staðið höfðu runnið niður 7 ölseiningar. Það er ljóst að slík neysla er ekki til að bæta þrek. Árangur fundarins var þó góður og farið var yfir leikskipulag og annað sem tengist langhlaupum. Endað var á því að leika ballskák þar sem aðstoðarmaðurinn hafði betur að lokum.

Nú er bara að drífa sig á æfingu og ná úr sér eitrinu. Ánægjulegur sigur hjá Liverpool eftir hörmungarnar undanfarið.

NG

Þú ert eitthundraðasti gestur síðunnar!!!!!!

Merkilegur áfangi náðist rétt í þessu í sögu þessarar síðu.

Eins og áður hafði verið auglýst hlýtur hundraðasti gesturinn flug með Icelandair að eigin vali á einhvern af áfangastöðum flugfélagsins.

Það var enginn annar en Nökkvi Gunnarsson sem var gestur númer eitthundrað. Hann getur vitjað vinningsins á skrifstofu félagsins að Eiðistorgi 9. Allar upplýsingar gefur Ellen Rut.

Til hamingju Nökkvi.

Grótta mætir KR á gervigrasvellinum við Suðurströnd á morgun

Á morgun kl. 11.30 árdegis, mætast Grótta og KR í meistaraflokki karla í knattspyrnu. Leikurinn fer fram á gervigrasvellinum við Suðurströnd. Löngu er orðið uppselt á leikinn en sá sem þetta skrifar getur útvegað nokkra miða fyrir áhugasama. Vinsamlegast skiljið eftir nafn og símanúmer í "athugasemdir" dálknum og ég mun hafa samband.

Þessi leikur verður í meira lagi fróðlegur, ekki síst fyrir þær sakir að Herra KR, Sigurður Helgason er orðinn aðstoðarþjálfari Gróttumanna. Siggi þekkir leikaðferðir KR-inga út og inn, það kæmi því ekki á óvart að Gróttumenn yrðu sterkir á heimavelli á morgun.

Annars er það að frétta að hjólað var á þrekhjóli í 60 mínútur nú rétt áðan. Þá var einnig lítillega tekið á lóðum. Hugsanlegt er að töflufundur fari fram síðar í kvöld á Ölveri, heimavelli aðstoðarmannsins.

 

NG

Reykjavíkurmaraþon 1985

Glöggir lesendur geta séð nafn þess sem þetta skrifar í Morgunblaðinu 27. ágúst 1985, þá 9 ára og 26 dögum betur. Tíminn 30.54 mín í 7 km, eitthvað sem maður myndi hoppa hæð sína yfir í dag. Menn þurfa reyndar að vera ansi glöggir, ég náði ekki myndinni stærri.Þetta er eina RM undirritaðs til þessa dags.Annars er það að frétta af undirrituðum að nákvæm læknisskoðun átti sér stað í morgun, þar sem farið var í hjartalínurit o.fl. Næst á dagskrá er að fara í samskonar línurit við áreynslu, það mun eiga sér stað n.k. miðvikudag kl. 11.20. Þessar skoðanir eru einungis gerðar í forvarnarskyni svo maður detti nú ekki niður dauður í einhverju hlaupinu.

Verkir eru á undanhaldi eftir hlaup miðvikudagsins og farið verður á þrekhjól í kvöld.

 

NG

Reykjavíkurmaraþon 1986

Skemmtilegur þessi veraldarvefur. Rakst á úrslit úr Reykjavíkurmaraþoni 1986 (7 km). 20 árum síðar er vel við hæfi að kíkja betur á það.

Piltar 12 ára og yngri

5   33:26   Sigurður Óli Hákonarson        1975    (var í KR með undirrituðum á þessum tíma)

7   34:21   Hannes Páll Guðmundsson        1975 (viðskiptafræðingur og sjúkraflutningamaður af Nesinu)

8   34:22   Heimir Jakob Þorfinnsson       1975 (bróðir Júlla, starfar sem málari)

10   35:29   Einar Baldvin Árnason          1974 (KR-ingur, lögfræðingur og sonur Árna Urriða)

29   37:37   Hafsteinn Guðmundsson          1975 ( hitti Hadda á Jólatrésskemmtun um daginn, hann hljóp hálft maraþon í svokölluðu Brúarhlaupi í DK fyrir 2 árum)

42   39:28   Mikael Nikulásson              1974 (Kr-ingur og framkvæmdastjóri fasteignasölu hér í borg)

43   39:29   Brynjólfur Bjarnason           1974 (knattspyrnumaður úr Selfoss, ÍR og fleiri liðum. Hlítur að hafa verið svekkjandi að vera 1 sek á eftri Mikka)

48   40:09   Gylfi Einarsson                1978 (knattspyrumaður í Leeds United)

50   40:25   Símon Geir Þorsteinsson        1975 (er ekki Símon að kenna íþróttir í Való eða Mýró?)

51   40:36   Ásmundur Haraldsson            1975 (Hvíta Perlan, langhlaupin voru aldrei hans sterkasta hlið. Meira fyrir að gæla við boltann)

 

 Piltar 13 til 17 ára

53   35:34   Rúnar Geir Gunnarsson          1973 (keppti í flokki öldunga. Tíminn hefði skilað honum í 12. sæti í flokki 12 ára og yngri)

Karlar 18 til 39 ára

  1   23:28   Ágúst Þorsteinsson             1957    (best þekktur sem Gústi smíðakennari. Var framkvæmdastjóri Reykjavíkurmaraþons til margra ára. Er nú hluti af leðurblökugenginu í Nesklúbbnum. Topp maður)

Mjög athyglisvert að hverfa 20 ár aftur í tímann. Sumir hafa unnið á, hjá öðrum hefur heldur hallað undan fæti. Allt eru þetta öðlingar og blessunarlega við hestaheilsu að því er ég best veit.

 

NG

 

Oft verið betri

Ástandið er ekkert sérstakt núna. Átti erfitt með að sofna í gær. Húsfreyjan gerði sér dælt við húsbóndann sem lá eins og skata og gat sig ekki hreyft.  Ekki oft sem slíkum kostaboðum er neitað. Svaf lítið í nótt vegna verkja. Liðband utanvert á hægra hné er aumt og táberg vinstri fótar einnig.

Það eru farnar að renna á mann margar grímur vegna verkefnisins framundan, spurning hvort einhver eigi hjólastól sem hann má missa? Það var þó vitað þegar ákvörðun var tekin að borgað yrði með blóði, svita og tárum. Sennilega er það eðlilegt að maður sé aðeins sár á líkama eftir svona langferð. Pottur í kvöld og hjól á morgun til að hlífa eymslum.

Annars er það að frétta að munntóbakið hefur fengið að víkja eftir 12 ára neyslu. Staðgengillinn er jórturleður, nikótínbætt, sem tuggið er af miklum móð með tilheyrandi vindverkjum.

NG

"þitt er mitt og mitt er mitt".

Rakst á aðra fyrir sömu kosningar. Eitthvað var ég sár út í Magnús Örn Guðmundsson "Manga" fyrrum stórhlaupara. Já og kannski núverandi stórhlaupara, þekki það ekki.

Leyfum þreyttum að hvílast!

 

Neslistinn, segir Nökkvi Gunnarsson, samanstendur af fólki sem annt er um umhverfi sitt.

Í Morgunblaðinu þann 9.5. s.l. brýst fram á ritvöllinn ungur frambjóðandi Sjálfstæðisflokksins á Seltjarnarnesi, Magnús Örn Guðmundsson, og fer mikinn. Ljóst er af máli frambjóðandans að hann hefur lært heima þau fræði sem móðurflokkurinn spinnur fyrir hverjar kosningar. Slæmt er til þess að vita að ungu fólki sé kennt að trúa því sem síður reynist rétt og því att fram með ranghugmyndir í þágu flokksins.

Í aðdraganda kosninga er öllu til tjaldað og haft er að leiðarljósi "þitt er mitt og mitt er mitt".

Í stuttu máli má segja að "höfundaréttur" sé hugtak sem ekki finnist í hugskotum sjálfstæðismanna á Seltjarnarnesi. Þessum orðum til stuðnings skal vitnað í skrif Magnúsar og dæmi nú hver fyrir sig.

"Náttúrugæði eru hér með eindæmum góð og skynsamlega staðið að skipulagsmálum þar sem ákvarðanir eru teknar að vel ígrunduðu máli í sátt við bæjarbúa."

Það er hinsvegar staðreynd að það hefur verið vilji sjálfstæðismanna á Seltjarnarnesi að byggja á vestursvæðunum svokölluðum og eyðileggja þar með þá sérstöðu sem Seltjarnarnesið hefur.

Í tvígang hafa þeir ákveðið uppá sitt eindæmi að eyðileggja þessa náttúruperlu þvert á vilja meirihluta bæjarbúa. Þessum áformum hefur hinsvegar verið afstýrt m.a. vegna söfnunar undirskrifta til verndunar svæðisins meðal bæjarbúa. Þessar aðgerðir voru alfarið á vegum Neslistans. Eftir stendur svo spurningin: Er þetta að taka ákvarðanir að vel ígrunduðu máli í sátt við bæjarbúa?

"Eitt mikilvægasta verkefni nýrrar bæjarstjórnar er að varðveita þann stöðugleika og ráðdeild sem einkennt hefur Seltjarnarnesbæ," segir Magnús einnig.

Hvaða stöðugleika? Skuldahöfuðstóll bæjarins hefur aukist um 27% á kjörtímabilinu. Í desember samþykkti meirihlutinn 5% raunhækkun á fasteignasköttum. Þeir lofa "fjölskylduvænni skattastefnu" á sama tíma og þeir innheimta hæstu leikskólagjöld sem þekkjast á höfuðborgarsvæðinu. Er þetta stöðugleikinn sem þarf að viðhalda? Í stærðfræðinni gefur mínus margfaldaður með nafna sínum plús. Þetta hafa sjálfstæðismenn á Nesinu lært.

Magnús talar einnig um sundrungu innan raða Neslistans. Tortryggnislexían hefur einnig skilað sér í uppeldinu.

Staðreyndin er hinsvegar sú að Neslistinn samanstendur af fólki sem annt er um umhverfi sitt og vill ýmislegt leggja í sölurnar til að varðveita þau gildi sem Seltjarnarnes hefur uppá að bjóða.

Í okkar hugum kallast fleira gildi en járnbentir steypukassar um víðan völl.

Ágætu Seltirningar. Í fjörutíu ár höfum við japlað á sömu tuggunni.

Á kjördag þann 25. maí býðst okkur næringarríkur aðalréttur í nafni Neslistans.

Þar fer samstilltur hópur fólks með hagsmuni manna og málleysingja í fararbroddi.

Höfundur skipar 5. sæti Neslistans.

 

Mikið vatn runnið til sjávar

Var að vafra á netinu og rakst á neðangreinda grein. Það hefur mikið vatn runnið til sjávar síðan, svo mikið að ég kaus þessa vindhana nú í vor. Reyndar er ég nokkuð ánægæur með greinina sem slíka.

Fimmtudaginn 23. maí, 2002 - Aðsent efni

Seltjarnarnes

Fálki eða vindhani á Seltjarnarnesi

 

D-listanum er ekki treystandi, segir Nökkvi Gunnarsson, þegar kemur að flóknum málum, flokkurinn þarf meira aðhald.

 

ÞAÐ hefur margt óprúttið komið frá D-listanum í þessari kosningabaráttu. Afhjúpuð hafa verið slagorð þeirra um lægstu skattaálögur hvort heldur er í formi útsvara eða fasteignaskatta. Hver Seltirningur hefur nefnilega undanfarin ár greitt meira í útsvar en nokkur annar á höfuðborgarsvæðinu og við greiðum næsthæstu fasteignagjöldin.

D-listinn heldur ótrauður áfram með blekkingarnar. Lítum á nokkur dæmi.

Nú hafa þeir sett sig á stall og segjast hafa staðið "að verndun vestursvæðanna". Hver er reynslan? Á árunum 1994-8 börðust sjálfstæðismenn hart fyrir því að reisa verulega íbúðarbyggð við Nesstofu. Neslistinn barðist gegn þessum áformum og beitti sér fyrir glæsilegri undirskriftarsöfnun með þverpólitískri þátttöku. D-listinn gafst því upp á byggingaráformunum rétt fyrir kosningar 1998. Byggingaráráttan blundaði þó í þeim og vaknaði hressilega á síðasta ári þegar þeir ákváðu að reisa skyldi 4000 fm hjúkrunarheimili við Nesstofu, eða ígildi 20 einbýlishúsa. Skrýtin verndunarsjónarmið!

Nú réttlætir D-listinn ákvörðunina með því, að ekki hafi verið til annað land fyrir heimilið og útskýra tvístígandann varðandi staðsetningu með því að nú fyrst megi mögulega finna hjúkrunarheimili stað á Hrólfsskálamel.

Aftur fara þeir rangt með staðreyndir. Í allri umræðu um skipulag melsins sl. tvö ár lá ljóst fyrir, að byggingarsvæðið næst Íþróttamiðstöð og íbúðum aldraðra væri tilbúið til byggingar, því rífa mætti Ísbjarnarhúsið svo að segja án fyrirvara. Þar mátti því strax staðsetja hjúkrunarheimili. Aumlegt er þeirra yfirklór!

D-listinn reynir nú að búa til þá mynd af Neslistanum að hann berjist fyrir landfyllingum. Staðreyndin er sú, að það var að tilstuðlan varaforseta bæjarstjórnar, Ernu Nielsen, að heimildarákvæði um miklar landfyllingar sunnan megin á nesinu var sett inn í drög að svæðisskipulagi höfuðborgarsvæðisins. Það var sami aðili, ásamt bæjarstjóra, sem lagði til að frestað yrði tillögu Neslistans um gerð hringtorgs á gatnamótum Suður- og Norðurstrandar, þar sem landfylling Reykjavíkur myndi ná inn á Seltjarnarnes og því þyrftu umferðarmannvirki að bíða. Þá voru sjálfstæðismenn fylgjandi þeirri landfyllingu. Eftir þetta allt saman töldum við rétt að fá heimildarákvæði inn í svæðisskipulagið um landfyllingu norðan megin. Þetta var samþykkt einróma í bæjarstjórn. Sjálfstæðismenn hafa verið leiðandi í landfyllingarumræðu og aldrei greitt atkvæði gegn slíkum áformum.

Landfyllingar eru ekki á stefnuskrá Neslistans.

D-listinn, sem fer fram undir slagorðinu "festa", hefur snúist eins og vindhani þegar kemur að stóru málunum, þrátt fyrir fálkann í skjaldarmerki flokksins.

Vindhani getur aldrei orðið vegvísir.

D-listanum er ekki treystandi þegar kemur að flóknum málum, flokkurinn þarf meira aðhald. Það gerist einungis með því að tryggja Neslistanum þrjá menn í bæjarstjórn.

Höfundur skipar 5. sæti á Neslistanum.

21 góður, eða ekki?

Erfitt var það, lengsta hlaup ferils undirritaðs.

Allur lemstraður eftir 21 km á tímanum 1.59.44 klst. . Fyrstu tólf voru í lagi þrátt fyrir erfitt færi en restin var alger pína. Það er ljóst að ekki verður hlaupið á morgun, sund og pottur. Er jafnvel að hugsa um að verðlauna mig með einum bjór, svona líka til að hlaða á kolvetnaforðann. Það verður þó að sjálfsögðu ekki gert nema með samþykki aðstoðarmannsins, vonandi að hann gefi grænt ljós.

Annars þýðir ekkert að vera að væla, 42.198 km er takmarkið í mars. Það er þó ljóst að maður á ansi langt í land.

 NG

Allir Þonarar þurfa góðan aðstoðarmann

Í gær náðist samkomulag við Hauk Óskarsson um að hann myndi aðstoða undirritaðan í aðdraganda og á meðan á Marsþoni stendur.

Viðræður snérust um útfærslur á áðurnefndri aðstoð.

1) Skyldi hann verða í hlutverki hérans?

2) Skyldi hann hjóla með hlauparanum?

3) Skyldi hann keyra á milli staða fyrstu 20-30 km og hjóla svo með rest? Til vara ef snjóþungt verður, þá verður aðstoðarmaðurinn á snjósleða.

 

Kostur númer 1 kom ekki til greina. Afhverju?

Aðstoðarmaðurinn reif sig upp af rasgatinu ekki alls fyrir löngu og ákvað að fara út að hlaupa. Hann hafði teiknað upp hring í huganum sem lagður yrði að baki. Þegar þeim hring var um það bil að ljúka var minn maður enn með góða meðvitund og ákvað að bæta við hringinn ca. 40%. Þegar komið var að leiðarenda var meðvitund farinn að minnka, en góð samviska sló á allar þjáningar. Seinna um kvöldið í endorfínvímu var ákveðið að mæla hringinn með hjálp heimilisbifreiðarinnar. Mælirinn var núllstilltur og haldið af stað ásamt húsfrúnni, nú skyldi henni sýndur afrakstur hlaupaferðarinnar fyrr um daginn. Ekki varð þetta nú langur bíltúr hjá þeim skötuhjúum, mælirinn sýndi 1,3 km að bíltúrnum loknum.

Skýt reyndar hér inn efni tölvupósts frá Hauki honum til varnar:

Sæll Elskan,

Ekki má þó gera lítið úr útihlaupi mínu árið 2006 en það var jú 1,5 km.  Einnig má geta þess að ég vann á tímabili hjá heildsölunni LEPPIN en þar vann ég m.a. við undirbúning flestra langhlaupa á landinu með honum Pétri Frantz fyrrverandi formanns Félags Maraþonhlaupara (þú veist það náttúrulega). 

En það hefur eflaust margt vatn runnið til sjávar síðan og búið að breyta innihaldi flestra drykkjarstöðva úr vatni og/eða orkudrykk í bjór.

En rétt er það - ég hef lítið vit á langhlaupum - en þú hefur náttúrulega ekkert vit á orðinu "hóf" :)

Annars góður - fór í ræktina í gær - vigtin hefur aldrei farið svona hátt þannig að nú er ég búinn að lýsa bumbunni stríð á hendur!

kv,

Þinn vinur

Haukur

Númer 2 var einnig afskrifaður.

Þriðji kosturinn varð því fyrir valinu.

Eins og sést hér áð ofan á tölvupósti aðstoðarmanns, þá er hann nú ekki alveg ókunnur hlaupum og er að eigin sögn góðvinur Péturs Frantz fyrrverandi formanni Félags Maraþonhlaupara. Einnig hefur hann langa starfsreynslu að baki hjá Leppin sem ætti að geta nýst vel í svona hlaupi. Undirritaður ber því gríðarlegar væntingar til þessa samstarfs og býður Hauk formlega velkominn til starfa.

 Annars er það að frétta af þeim sem þetta skrifar að undanfarna daga hefur verið hjólað í ræktinni vegna minniháttar álagsmeiðsla. 50, 60, og 90 mínútur. Í kvöld er svo planið að taka 2 tíma útihlaup.

 

NG

Upphaf

Gott kvöld.

Ekki óraði mig fyrir því að ég ætti eftir að gerast bloggari, en ég ætla að prófa. Ég kann reyndar ekki að blogga,  en það hlítur að lærast eins og annað.

Ástæðan er öðru fremur sú að þann 3. nóvember 2006 byrjaði ég að hlaupa og það hefur ágerst svo mikið að ég get núorðið kallað mig hlaupafíkil með góðri samvisku. Þetta er allt hið undarlegasta mál, í upphafi var það kvöð að drífa sig af stað, en eftir því sem þrekið jókst fór þetta að verða þolanlegra og nú er svo komið að ég get ekki án þess verið að hlaupa í a.m.k. klukkutíma á dag. Nú hefur stefnan verið tekin á Maraþon, eða Þon eins og mjög reyndir hlauparar kalla það, helst strax í lok marsmánaðar ef undirbúningur verður meiðslalaus. Ég hef fundið prógram á annari blogsíðu,http://hlaup.malbein.net/blog/?page_id=301 nánar tiltekið "Dagbók ritarans" sem haldið er úti af Gísla Ásgeirssyni, ritara Félags Maraþonhlaupara sem greinilega er mikill snillingur, þekki ég þó manninn ekkert. Vonandi dugar það prógram til þess að koma manni í þann félagsskap áður en langt um líður.

Tilgangur þessarar síðu er meðal annars að hjálpa undirrituðum að halda utan um undirbúning fyrir áðurnefnt Þon og leyfa öðrum, ef einhverjir hafa áhuga, að fylgjast með. Ég er nefnilega orðinn það manískur að ég tala ekki orðið um annað en hlaup og get ímyndað mér að vinir og kunningjar séu orðnir þreyttir á því rausi. Nú ef ekki, geta menn og konur komið hingað inn og fylgst með hvernig gengur.

Eins og áður segir þá byrjaði þetta hlaupaball þann 3. nóvember 2006. Í fyrstu var lagður að baki svokallaður Neshringur, sem mælist 3400 metrar. Þetta var maður að silast á rúmum 20 mínútum til að byrja með. Fljótlega fór þó hraðinn að aukast og ástandið að batna eftir að hringnum var lokið. Að tveimur vikum liðnum langaði mig að prófa að fara lengra, fyrst 4 km, þá 5 km og þann 15. nóvember hljóp ég 9 km. Þetta fannst mér ótrúleg vegalengd og mikið var ég ánægður með sjálfan mig 58 mínútum eftir að ég lagði upp í þessa langferð, en þá var komið í mark. Upp frá þessu var tekin sú ákvörðun að fara í Gamlárshlaup ÍR, sem eins og nafnið gefur til kynna er þreytt þann 31. desember. Markmið var sett og það var að fara undir 55 mínútur.

Í framhaldinu var farið í göngugreiningu og fjárfest í forláta hlaupaskóm. Svo var haldið áfram að hlaupa. Yfirleitt 10 km, lengst 16 km og svo hafði ég lesið mér til um það að maður þyrfti að fara svokallaða hraðleiki til að auka hraðann. Í það var notaður Neshringurinn og hlaupið upp allar Strandir við Norðurströnd á vaxandi hraða, svo var skokkað mjög rólega niður. Þessum æfingum var blandað saman og samtals voru lagðir að baki 105 km í nóvember og 136 km í desember.

Svo var komið að stóra deginum, 31. desember, Gamlárshlaup ÍR. Á jólagjafalistanum höfðu verið spandexbuxur, hlaupaúr með púlsmæli og hraðamæli, drykkjarbelti, hlaupavetlingar o.fl. Þetta þýddi að undirritaður gat mætt til leiks án þess að horft væri á mann eins og geimveru. Um morguninn gerði vart við sig nettur niðurgangur vegna spennu eins og oft gerist fyrir mikilvæg golfmót, fyrir erfiða fundi í vinnunni eða fyrir mikilvæga leiki í gamla daga. Svo mikil var eftirvæntingin. Í rásmarkinu þar sem ég hafði komið mér fyrir með aftasta fólki, til þess að vera nú örugglega ekki fyrir neinum, uppgötvaði ég mér til mikillar skelfingar að ipod-inn hafði orðið eftir heima.

 Flugeldur fór í loftið og hlaupið var hafið. Fyrstu 3 mínúturnar voru farnar á gönguhraða enda á að giska um 500 manns á undan á misjöfnum hraða. Eftir að komið var út að Mýrargötu var gefið í, mér fannst ég þurfa að vinna upp tapaðan tíma úr startinu. Frá 1 km og fram að 5 km sýndi klukkan um 4.30 mín pr. km, sem var náttúrulega alltof hratt eins og átti eftir að koma á daginn. Mér leið þó ágætlega þegar komið var að Bakkavör eftir um 5,5 km, en að brekkunni lokinni var ég alveg búinn. Púlsklukkan sýndi 188 slög og ekki var um annað að ræða en að hægja á. Að 6 km loknum sýndi klukkan 29.03 mín. Síðustu 4 km voru mikið strögl, en hlaupinu skyldi lokið og það hafðist á tímanum 51.29 mín sem var vel undir markmiði og betra en ég þorði að vona.

 Hvílík skemmtun og hvílík vellíðan að hlaupi loknu, þrátt fyrir mikla vanlíðan síðustu 4 km. Nú er ekki aftur snúið, um áramót voru sett markmið eins og siður er. Þau markmið eru flest tengd þessari hlaupadellu. Best að birta þau hér, til að setja á sig smá pressu. Jafnvel þó ég hafi ekki hugmynd um hvort þau séu raunhæf eða ekki.

1) Ljúka Þoni á 3.40 klst á árinu.

2) Ljúka hálfu á 1.40 klst á árinu.

3) Ljúka 10 km á undir 40 mín á árinu

4) Ljúka Marsþoni á 4.10 klst

 Mjög ögrandi markmið og hugsanlega ekki raunhæf fyrir tveggja metra og hundrað kílóa óreglumann, en ég ætla að reyna og vonandi kemur lífsstíllinn með. Maður hefur svo sem ekki verið þekktur fyrir að gera hlutina með einhverju hálfkáki hingað til.

 

Shit hvað maður er orðinn steiktur.